بريدة






عـودة للخلف بريدة ستي » بريدة ستي » سـوالـيـف كـشكـولـيـة » }{ زمــهريــر مـراهقــتـي }{ :d

سـوالـيـف كـشكـولـيـة الطرائف و الألغاز - يمنع مشاركة النساء

إضافة رد
 
أدوات الموضوع طريقة العرض
قديم(ـة) 09-09-2012, 10:31 PM   #1
عبد الرحمن33
عـضـو
 
صورة عبد الرحمن33 الرمزية
 
تاريخ التسجيل: Feb 2012
البلد: المملكـه العـربيه السعوديه
المشاركات: 300
}{ زمــهريــر مـراهقــتـي }{ :d

أهلاً بالشباب واحداً تلو واحد

لكل منا طفولة و مراهقة < إحلف و لكن طفولتي و مراهقتي كانت تختلف تماماً

< أقول إخلص علينا و إدخل بالموضوع و لا يكثر


أنا شاب لم أتعرض لأي حالة تحرش .. لكن تعرضت لشيء أكبر
الشيء تجدونه بالسطر اللي تحته <حاصل ع جائزة نوبل للأكشن والسماجة
تعرضت لـ أحقر العبارات والكلمات اللفظية والمعاملة القاسية
وتراكمت علي كل الأمراض النفسية
طفولتي كانت عكس بزران العالم .. جلست في بطن أمي 5 شهور فقط !!
وطلعت من المخرج الرئيسي بدون عملية قيصرية ذاقت أميمتي أشد العذاب والألم
عموما كتب الله لي النجاح وعشت أنا وأمي ولم يتوفى منا أحداً ..
لكني دخت الحضانة اللي هي غرفة وبوسطه سرر مغلفه بـ قزاز ..< وش هالتوصيف ياشيخ
و جلست بالحضانة 3 سنوات !! < شكله جازت لي القعده فـكنت أتغذى على أجهزة المستشفيات والأنابيب المليئة بالحليب
والماء العذب والمحلولات الحمضية المشبعة < الكلمة الأخيرة مسروقة من كتاب الكيمياء

خرجت من السجن أقصد المستشفى و طلعت معافى مابي أي شيء ! < قولوا ماشاء الله
قد تستغرب يا أيها القارئ الكريم سبب بقائي في الهوسبتل 3 سنوات !! و لكني كنت أعاني من أمراض في القلب والرئتين

وصعوبة في البكاء ورجلي اليسار مشلولة لاتتحرك وعيوني وحده مفتوحة والثانية مقفلة
والأذن اليسرى مليئة بالصديد
وأحد الفلينيات من السسترات لاحظت أن ركبتي سوداء !!
وقالت للدكتور فيما معناه : أول مرة أشوف ولد سعودي ركبته سوداء !! لو بنت كان ماأستغربت .. المهم حصلت (معجزة) وخرجت من المستشفى سليماً معافاً و المصيبة إن أمي نست إن عنده بزر بالمستشفى وغسلت إيده بعد ما خبروه الدكاتره إن ولده مش طبيعي
وعاشت الـثلاث سنين براحة
وكأن ولادتي مثل بعض الأحلام إذا قمت تنساه يوم قامت الصبح و (يزهم )< كلمة جدتي
و يزهم عليه التلفون بمعنى (إتصل عليه التلفون) < وش قالوا لك بنقالية ما نفهم
وتحصل الفلبينية تقوله تعالي خوذي ولدتس !! أستغربت
وجاء على باله : متى ندفنه العصر وإلا المغرب ؟ .. ردت عليه وقالت : كيف توفى ؟
قالت أم فلبن : مافيه موت فيه حياااة جديدو
<خريج دبلجة أفلام فلبينية ههههه < لا يكثر بس

وطااااارت أمي من الفرحة لدرجة إنه قامت تناقز بالصالة
دق السلف أبوي ومعه أمي وصفطوا الطبلون وصادهم ساهر لين قالوا بس
ولسان حالهم بذلك الوقت (كل شيء من أجلك يهون يا دحوم المحبوب وغلاتك لأجننهم )

بعد ماعانقون ومطخون لين ماصار كل وجهي سعابيل أخذون للبيت
كان أبوي متشدد وشكاك وأمي عصبية وتربيته قاسية جداً عكس الأمهات لأخرى !!
< وش هالعائلة الغريبة
المهم إني سجلت بالحلقة حقت مسجد بيتنا بالغصب
من يوم عمري بـ 2 إبتدائي وسجلت بتوعية المدرسة كذلك من بداية أيام المتوسط
بالعربي خالطت المطاوعى ! وكانوا أصدقاي كلهم مايعرفون إلا حامد الضبعان إذا حبوا ينطربون شغلوا أحد أناشيده الرومانسية
ومن ضممنهن (الجيب جاهز) وحرام حرام ياخنافس
^ما أحد راح يعرفهن إلا إذا كان يعرفهن
وكان ماعندي نت بالبيت فقط سوني ون شريط كورة ايام باتستوا ونجوم العالم وربيرتو كارلوس نص الشعب يخلونه هجوم وكراش ..
حتى كنت ألعب بدون موسيقى وإذا كان مافيه خيار للموسيقى ألعب بدون صوت
وكنت راعي دوران بالشوارع بـ سيكلي العجيب اللي زكرشته وضبطته

بعد سنين تغيرت حياتي رأس على عقب !



ما خلصت بس إنتظرون أكمل
عبد الرحمن33 غير متصل   الرد باقتباس


قديم(ـة) 09-09-2012, 11:46 PM   #2
عبد الرحمن33
عـضـو
 
صورة عبد الرحمن33 الرمزية
 
تاريخ التسجيل: Feb 2012
البلد: المملكـه العـربيه السعوديه
المشاركات: 300



دخلت الجامعة وتعرفت على أخوياء غير شكل ..
وأنتقلت من عالم الدين إلى العالم المولي !!
زي ماقلت لكم صاحبت دشير بكل ماتعنيه هذه الكلمة من معنى ! بداية دشرتي شاهد فيلم بدون صوت علشان الموسيقى الله يجزان خير !
بعدين صرت أسمع أغاني أول شيء طحت بنانسي عجرم وهالنمونه لين أصبحت متذوق وعاشق لـ طلال مداح وعبادي جوهر لكن لازلت أعشق موضي ههههه

عموما تطور الأمر وتعرفون مراهق ووده يكمل رجولته فطاح بالمغازل والترقيم !
، كان لي خوي (من ضمن شلة الدشير ) يعتبر هو القريب لـي
هو بيني وبينكم صاحب الدور البارز بغسل مخي وتحويلي إلى سربوت قاضي وإسم الرجال "ميشو"
أحد المرات كنت أنا و هو طالعين مع بعض لحالنا ندور بالشوارع ! الوكاد من ضمن السواليف قال ميشو لـي ،
دحوم عمرك حبيت ؟
قلت "إيه أحبك أنت" ! قال " يادلخ أقصد عمرك حبيت لك بنيه ؟
قلت "بنيه تقصد يعني بنت ! ذولي اللي نشوفهن بعبايتهن السود اللي أمي من ضمنهن !؟
(على فكرة أنا ماعندي خوات ولاخالات ولاعمات ) < مقطوع من شجرة
قال ميشو "إيه ياأنشتاين هن اللي أقصدهن !"
قلت "طيب أقدر أختار على ذوقي وثم أحب ؟!
ميشو كان يشرب ميرندا برتقال ويوم سمع كلامي جدع قوطي الميرندا بجبهتي !
يقول لي أنت خبل فيك شيء ؟ كيف تختار وتنقى على كيفك ؟ ماحنا بمزايين أم رقيبة ياالمنب قايل !
قلت طيب "وشلون تبغين أحب على عماي" ؟ قال "بسيطة يا الذيب تكشخ ورح للسوق ورقم !
قلت طيب أبيك تخاوين وتعلمن توي عليم ! قال ميشو "أبشر يالذيب بعزك ماطلبت شيء" (إبليس)
من بكرى رحنا للسوق ، وأنا كاشخ كأني عريس و أشوف مره وهماي جديد ومدرعم فجأة صوت لـه
"هيه أنتِ يامره تراي أحبك أكثر من خويي ميشو"
البنت وميشو مطيرين عيونهم وش يحس به ذا وأنا بديت أشك بعمري وأطالع خويي ياخوي وش فيك ؟
وبعدين لاتجلس وتطالع بحبيبتي :133: ويسحبن خويي ويطلعن من السوق ويبدأ يهاوشن ويقول : على طول تقوله أحبك ؟ أنت تغازل بزر وإلا بنت ؟
قلت " ياخوي أقلقتنا وش تبيني أسوي ؟ "
قال ميشو "الشغل يحتاج حبه حبه ! مهب بالعجلة وين عايش أنت ؟
قلت له "أقول تلايص أجل أنا هذا أسلوبي واللي يبغاني حياه الله" قال ميشو "وش اللي يخليني أقولك أصلا أنت وجهك حتى لحجيات مكه ينحاشن منك
قلت "الجمال جمال الروح" ! ههههه قال " يارجال روحك أشين من خشتك"

يوم رجعت للبيت ، بديت أحس إن اللي سويته اليوم شيء يفشل ..فـ قررت أنزل من بكرى السوق لحالي ! علشان ماأحد يوبخن
رحت قبل مايفتح السوق من الحماس ! وبعد مافتح جلست أقزقز وأدور حبيبه ، لين ماطحت بوحده بلشت به و قعدت عله على قلبي !
عطتن وجه ويوم جدعت عليه الرقم و أنا أرفع ثوبي وأركض قدام العالم
من الفرحة توجهت لـ سيارة .. وقعدت أصارخ بسيارتي و أنا أقول : "جبتها يا دحوم جبتها"
وشغلت موضي وكان أجمل يوم بحياتي
بديت أكلمه وأشحن له لين ماصرت مطفر .. وكنت أترجاه تطلع معي لكن ترفض لين جاء اليوم اللي وافقت فيه بالخروج معي
و بعد ما طلنا مع بعض طبت الهيئة علينا
وعرف أبوي بالسالفه وطردن من البيت ! طبعا البنت تستروا عليه لأنه إمرأه ياويلي ضعيفه هههههههه
وصرت أنام بإستراحة الشباب ، ومن شدة التلفت (يعني من قوة الفضاوه)
بديت أدخل بعالم النت
وشوي شوي لين بدأ يرتقي فكري وصرت أنوع إهتماماتي .. كنت فاهم كورة وراعي تحجير ولقم لأي واحد يناقشن
أحد المرات حصل ناس تتكلم عن الدين ودخلت معهم بنقاش ونظامي كان (درعمه)
و طبعاً لأول مره يطيح وجهي وآكل تبن وتراب لأني جالسن أناظر (طلاب علم) وأنا زين أعرف أقرأ الفاتحة
وأحيانا أخبط بين الركوع والسجود مره أقول بالركوع سبحان ربي الأعلى
وبالسجود سبحان ربي العظيم
المهم ماعلينا من صلاتي هذي بيني وبين ربي
لكن علشان أوضح لكم قوة دشرتي وتخلفي في أمور ديني
و بعد ماطلعت منهم بديت أبحث عن أفضل الكتب اللي تتكلم وتشرح الدين بشكل صحيح وأنا رايح للمكتبة شفت واحد عند الكتب الدينية وبديت أسأله عن الكتب ومن هالكلام
لين ماشبكته وأخذت رقمه لكن هالمره تشبيكي بنية طيبة وحب في الله
بديت أطلع معه وأسأله عن أي شيء أجهله أو اعجز ماأفهمه حتى بدأ فكري ينضج لأني قريت وتعلمت وتثقفت وبديت أأثر بـ خواياي (غزو عربي)
وخاصة خويي العزيز ميشو
اللي كان من أسباب إنتكاستي .. لكني رديت للدين بطريقة رائعة
و بعد فترة ، رجعت لـ أبوي أعتذر ومن شدة الربكه والخرشه بدال ماأحب راسه
حبيت بطنه
و بعد أخذ وعطى سامحن نصف مسامحه جلست تحت المراقبة من الإستخبارات العائلية
إلا والله كل ماسأل أبوي عن إلا والله كلن يمدحن !
ووصل مخططي اللي هو الغزو العربي (لـ أبوي وأمي) فـ بديت أصحح من قناعاتهم الخاطئة (وياشين لا جيت تغير شايب أو عجوز )
وصارت حياتي وحياة محيطي اللي عايش به (بيئة صالحة دينياً)
لامبالغة ولا إستخفاف !

إنتهت



ملحوظة /
لقد أدرجتها في منتدى آخر
__________________
* من يركزون على الأخطاء اللغوية و ينسـون محتوى الموضـوع / يذكروني بالمثل الصيني الذي يقول :
" أنا أشير إلى القمر و الأحمق ينظـر إلى إصبعـي "
عبد الرحمن33 غير متصل   الرد باقتباس
قديم(ـة) 10-09-2012, 02:39 AM   #3
ملك الحنيه
عـضـو
 
صورة ملك الحنيه الرمزية
 
تاريخ التسجيل: Aug 2012
البلد: بريده
المشاركات: 173
الخطا الاستمرار بالخطا نفسه اما التراجع وسلك الطريق الصحيح هو الافضل
لله درك ياذيبان تحياتي وتقديري متصفح يستحق القراءه اكثر من مره ....... مشكووووووور
__________________
فرصه سعيده يوم انا جيت مشتاق ؟؟؟؟؟؟ تدفعني اللهــفــه وفــرصه ســـعيدهــــ
ازف للغالين حبي والاشــــوااااق ؟؟؟؟؟؟ والمفــردهــ وبيوت شعر ٍ جــــديدهـــ
من الشماال الين ماتاصل رواااق ؟؟؟؟ ومن شرقها الى غرب واوسط بريدهـ
وختامها باعداد ماناااض برااااق ؟؟؟؟؟ صـــلــوا علــى محمد مــرارا عديدهــ
ملك الحنيه غير متصل   الرد باقتباس
قديم(ـة) 10-09-2012, 03:16 AM   #4
ابراهيم الفليحي
عـضـو
 
تاريخ التسجيل: Sep 2011
البلد: ببريده
المشاركات: 26
قصه شمعه منوره

لله درك يادحووم

سجل اول متابعينك انا

اي هيك فضاوة
ابراهيم الفليحي غير متصل   الرد باقتباس
قديم(ـة) 10-09-2012, 06:57 AM   #5
girnaaas
عـضـو
 
صورة girnaaas الرمزية
 
تاريخ التسجيل: Feb 2012
البلد: القصيم
المشاركات: 230
°
°
هههههههههه أنا ما أدري وشلون طلعت من المستشفى وأنت بك كل هالعلل
و إلا يوم تحب بطن أبوك <<<<< واضح إني قاعد أتخيل الشكل
شكرا يابو دحم
°
°
__________________
°° girnaaas alyaaami °°
girnaaas غير متصل   الرد باقتباس
قديم(ـة) 10-09-2012, 04:23 PM   #6
مااااجد2011
عـضـو
 
صورة مااااجد2011 الرمزية
 
تاريخ التسجيل: Nov 2011
البلد: القصيم
المشاركات: 258
والله إن الهذر كثير ماشاء الله لكن قرأت الجزء الأول و لي رجعه بإذن الله
مااااجد2011 غير متصل   الرد باقتباس
قديم(ـة) 10-09-2012, 08:44 PM   #7
تمر القصيم
عـضـو
 
صورة تمر القصيم الرمزية
 
تاريخ التسجيل: Aug 2009
البلد: ܔْށلاتنسَ ذكر اللهܔْށ
المشاركات: 2,667
فحمت ونا أقرى من طول الموضوع ..
__________________
والله مافي هذه الدنيا ألذ من اشتياق العبد للرحمن


لـئِـنّ الـمَوْتَ فـي الـثـكـنَاتِ خيـرٌ .. مـنَ الـدُنـيـَا و مـا مـَلَـكـ العـَبِـيدُ ..!
تمر القصيم غير متصل   الرد باقتباس
قديم(ـة) 10-09-2012, 09:50 PM   #8
M.mrtz
عـضـو
 
صورة M.mrtz الرمزية
 
تاريخ التسجيل: Mar 2012
البلد: أينما كنت ...
المشاركات: 130




أضحكتن أضحك الله سنك
__________________
*

لو تبتسم فِ / وجيه الأغرَاب عادي
بِ / ﭑﻟعكس تكسب غير الأجر ﭑﻟمحبّه ،
ﭑﻟلي مَ / هو عادي ، وضد - ﭑﻟمبَادي

تكشيرك فِ / وجيْه الأهل .. والاحبّه
*
M.mrtz
M.mrtz غير متصل   الرد باقتباس
قديم(ـة) 12-09-2012, 11:18 AM   #9
حربي عابر دربي
عـضـو
 
صورة حربي عابر دربي الرمزية
 
تاريخ التسجيل: Jan 2011
البلد: بذا فيذا هنا
المشاركات: 4,927
حشى بالعن رادو

سيرتك عطره وترفع الرآس انت وخويك ميشو

تستاهل التميز

وحاول تطبع السيرة الذاتيه حقتك وتبروزها وتعلقها بالمجلس حقكم ... ياحظ ابوك بك ..ذذ

تقول صرت امطوع ( علينا )

قل انك نويت تخطب

موفق يا موفق
حربي عابر دربي غير متصل   الرد باقتباس
قديم(ـة) 12-09-2012, 03:33 PM   #10
عبد الرحمن33
عـضـو
 
صورة عبد الرحمن33 الرمزية
 
تاريخ التسجيل: Feb 2012
البلد: المملكـه العـربيه السعوديه
المشاركات: 300
اقتباس
الخطا الاستمرار بالخطا نفسه اما التراجع وسلك الطريق الصحيح هو الافضل

اقتباس

لله درك ياذيبان تحياتي وتقديري متصفح يستحق القراءه اكثر من مره ....... مشكووووووور



شكراً يا الغالي
و ننتظر مواضيعك المُتميزة



اقتباس
قصه شمعه منوره

اقتباس


لله درك يادحووم

سجل اول متابعينك انا

اي هيك فضاوة





أخجلت تواضعي يا أخ العرب
لك


اقتباس
°

اقتباس

°
هههههههههه أنا ما أدري وشلون طلعت من المستشفى وأنت بك كل هالعلل
و إلا يوم تحب بطن أبوك <<<<< واضح إني قاعد أتخيل الشكل
شكرا يابو دحم
°
°




هههههههههههه
عاد كتب لي الله و طلعت من المستشفى
لكن قل ماشاء الله
شكراً يا ابو خالد



اقتباس
والله إن الهذر كثير ماشاء الله لكن قرأت الجزء الأول و لي رجعه بإذن الله




أنتظرك حبيبي مجود


اقتباس
فحمت ونا أقرى من طول الموضوع ..



إشرب ماء










اقتباس

أضحكتن أضحك الله سنك

اقتباس



و ضرسك
شكراً مرتز


اقتباس
حشى بالعن رادو

اقتباس


سيرتك عطره وترفع الرآس انت وخويك ميشو

تستاهل التميز

وحاول تطبع السيرة الذاتيه حقتك وتبروزها وتعلقها بالمجلس حقكم ... ياحظ ابوك بك ..ذذ

تقول صرت امطوع ( علينا )

قل انك نويت تخطب

موفق يا موفق




إيه لا تعلم أحد
شكراً حربي


__________________
* من يركزون على الأخطاء اللغوية و ينسـون محتوى الموضـوع / يذكروني بالمثل الصيني الذي يقول :
" أنا أشير إلى القمر و الأحمق ينظـر إلى إصبعـي "
عبد الرحمن33 غير متصل   الرد باقتباس
قديم(ـة) 12-09-2012, 07:13 PM   #11
تمر القصيم
عـضـو
 
صورة تمر القصيم الرمزية
 
تاريخ التسجيل: Aug 2009
البلد: ܔْށلاتنسَ ذكر اللهܔْށ
المشاركات: 2,667
والله التطوع إنه فكرة طيبة ..
__________________
والله مافي هذه الدنيا ألذ من اشتياق العبد للرحمن


لـئِـنّ الـمَوْتَ فـي الـثـكـنَاتِ خيـرٌ .. مـنَ الـدُنـيـَا و مـا مـَلَـكـ العـَبِـيدُ ..!
تمر القصيم غير متصل   الرد باقتباس
قديم(ـة) 15-09-2012, 03:09 AM   #12
حربي عابر دربي
عـضـو
 
صورة حربي عابر دربي الرمزية
 
تاريخ التسجيل: Jan 2011
البلد: بذا فيذا هنا
المشاركات: 4,927
اقتباس
المشاركة الأساسية كتبها تمر القصيم
والله التطوع إنه فكرة طيبة ..

هذا التطوع للجيش يالحبيب

لكن دواه عندي وهذا اثبات للهيعه انهم يجلدونه كم عصا لين يشوف انجوم القايله بوضح النهار

لكن ميشو شكله يبي ياكله بالحجز

فين تشتغل يا عبدالرحمن
حربي عابر دربي غير متصل   الرد باقتباس
قديم(ـة) 15-09-2012, 07:01 PM   #13
تمر القصيم
عـضـو
 
صورة تمر القصيم الرمزية
 
تاريخ التسجيل: Aug 2009
البلد: ܔْށلاتنسَ ذكر اللهܔْށ
المشاركات: 2,667
^^^^^^^^^^^^
بالبحث الجنَّائي..
ههههههههههههههههههههههههههههههههههه
__________________
والله مافي هذه الدنيا ألذ من اشتياق العبد للرحمن


لـئِـنّ الـمَوْتَ فـي الـثـكـنَاتِ خيـرٌ .. مـنَ الـدُنـيـَا و مـا مـَلَـكـ العـَبِـيدُ ..!
تمر القصيم غير متصل   الرد باقتباس
قديم(ـة) 16-09-2012, 02:43 AM   #14
ابو عقيل القصيم
عـضـو
 
تاريخ التسجيل: Sep 2012
البلد: القصيم
المشاركات: 27
يا حليلك يا دحوم ما شاء الله عليك قصة ممتعه لكن وش صار على ميشو التزم مثلك ولا الا الحين بنخيل ابلازا
ابو عقيل القصيم غير متصل   الرد باقتباس
إضافة رد

الإشارات المرجعية

أدوات الموضوع
طريقة العرض

قوانين المشاركة
لا يمكنك إضافة مواضيع
لا يمكنك إضافة ردود
لا يمكنك إضافة مرفقات
لا يمكنك تعديل مشاركاتك

رمز [IMG] متاح
رموز HTML مغلق

انتقل إلى


الساعة الآن +4: 12:01 PM.


Powered by vBulletin® Version 3.8.6
Copyright ©2000 - 2017, Jelsoft Enterprises Ltd

المنشور في بريدة ستي يعبر عن رأي كاتبها فقط
(RSS)-(RSS 2.0)-(XML)-(sitemap)-(HTML)