بريدة






عـودة للخلف بريدة ستي » بريدة ستي » ســاحـة مــفــتــوحـــة » ساحات حوار تنقلها لكم ( قارورة بيبسي )

ســاحـة مــفــتــوحـــة المواضيع الجادة ، والنقاشات الهادفة -- يمنع المنقول

موضوع مغلق
 
أدوات الموضوع طريقة العرض
قديم(ـة) 28-10-2001, 12:47 AM   #1
العم علي
عـضـو
 
تاريخ التسجيل: Oct 2001
المشاركات: 230
ساحات حوار تنقلها لكم ( قارورة بيبسي )

قارورة البيبسى من مميزاتها أنها رخيصة الثمن سعرها نص ريال وطعمها لذيذ وتشربها وترجعها للصندوق ثم ترجع للمصنع يعيدون تعبئتها وتروح لشخص أخر وفي مكان مختلف لذلك حلو نتخيل مشوار قارورة البيبسى ومشاهداتها بين عائلة وأخرى وبين فئة إجماعية راقية وأخرى دانية بين عائلة غنية وأخرى فقيرة وكذلك لا ننسى قد تتواجد على طاولة مباحثات سياسية بين زعماء العالم !!
ذهبت القارورة مع صندوق البيبسى لأحد السوبر ماركات ووضعت بالثلاجة !! ثم ما لبثت أن تبرد حتى تلقفتها يد أخوكم سلطان، واخذها واوديها للوالده كانت جالسة تاكل كراث ومشتهية معه بيبسي ( الله من زين المزاج ) المهم جلست القارورة بيني وبين الوالده ودار الحوار السياسي بين سلطان وامه ، وأنقل لكم نص الحوار :
سلطان : هااااه يمه اشوفتس سياسية وتابعين الاخبار !!
أمي : ايه والله جالسة أتسمع لحقين القاعدة ولد الغيث يوم يقول ان حنا ريضينن في امريكا بنضربهم ليـــن يخيس جلدهم ، وقام يتوعد في بوس وابوه وبعد شاركون يقول بيطقونه !!
سلطان : وين يمه !! وش بوس ؟ هذا أسمه بوش والاخر اسمه شارون !! أكيد ابوي يسميه بوس بس انتي مافهمتي وش يقصد والا وش يبي !! يا حليلتس يا ميمتي على نياتس وبعدين والله يا أسلوبك انه فعلا سياسي !!
أمي : يعني ما يعرف في السياسة الا انتم !! اييييه مانقول الا الله ينصر الاسلام والمسلمين بس !!
سلطان : طيب يمه وش رايك بالسياسة الخارجية الامريكية وكيف جذبوا معهم الرأي العام العالمي !!
أمي : والله مدري بس هم جالسين يرمون بسكوت مع دريشة الطيارات للافغان ومع الدريشة الثانية يرمون عليهم قنابل وصواريخ وبعدين منهو هذا الرجال اللي يخافون منه اللي هو الرأي العام ولد العالمي !!
سلطان: يلومووووووووووووووووووووووني فيتس يمه امووووت في السياسيات العجز اذا صارن يحللون الامور السياسية مع كراث ... أبوووك يالسياسة !! هذا يمه رجال ولد حمايل يسمونه الراي العام ساكن في الصباخ !! الا يمه والله راسي دار من أكل هالكراث وودي أسألك الزيتون له رجول ؟
أمي : لا يا وليدي وش جاب الرجول للزيتون !!
سلطان : أهااااا أجل يمه شكلي أكلت خنفس !!
أمي : وجع يوجعك يالماصل أهوووه أثمك أشوف خل أطلعه وانا امك بسمله عليك !!

المهم خلصت امي من قحن البيبسي ، وانتهينا من السواليف وتم ترجيع القارورة للصندوق وتم تعبئتها من المصنع وذهبت مع مجموعة صناديق لأحد شركات خطوط الطيران لتقديمها مع إحدى الوجبات لركاب الطائرة المسافرين للدوحة ، وما ان تم تقديمها لإحد الركاب إلا وبدأ في تناول طعام العشاء وهو يتحدث مع زميله عن هموم الدول الإسلامية والمسلمين وما يواجهونه من ضغط غير مبرر من دول الكفر بحجة ضرب معاقل الإرهاب !!
وبعد تنزيل القوارير الفاضيه لمصنع البيبسى في الدوحة تم تعبئتها من جديد وإرسالها لتقديمها مع مجموعة المشروبات الغازية والعصيرات لضيوف الدوحة من وزراء الخارجية للدول الإسلامية وتم وضعها على طاولة المباحثات وكانت هذه الحوارات المتبادلة بين الوزراء وكان من ضمن الحضور كوفي عنان وتم إرسال البيان الختامي معه لأنه كان رايح لبوش !!
خرجت القارورة من القاعة ووضعت مع سندويشه وعلبة عصير في شنطة كوفي عنان وأعطوه وجبة دسمة عشان ما يعلم وش دار من نقاشات جانبية !!
وذهب كوفي عنان الى أمريكا ومعه شنطته وفيها القارورة والوجبة ( حالفين عليه انه ياكلها لو في بيته اذا وصل ) وجلس مع بوش ومن المصادفة كان مع بوش الحمار شارون !! وكان هذا الحوار :
بوش : لآلا يهمك ياشارون هذا كوفي عنان حبيب ما يقول شي حنا اللي حاطينه
شارون : أشوى ... وإلا والله كان أتغصه مع العلباة
كوفي عنان : لآلا والله أنا من يدك هذى ليدك هذى بس دنا غلباااان !!
بوش : هاه يا شارون وش رأيك هالحين !! الشعوب الإسلامية ثايرة والخوف من عواقبها كبير !!

شارون : يا رجال وسع صدرك ... أنتم ما عندكم كيماوي .. رشوهم والله ما أحد قايل شي !! رح وأنا المسئول !! قال أيش قال خايف !! أهم شي الروس الكبار أنت ما سلفتهم وعطيتهم قروض !! والمفروض انهم يسددون !! أي واحد يفتح أثمه قله سدد القروض اللي عليك وإلا بنسوي عليك حضر اقتصادي .. حتى الحفايظ سو عليها حضر ... ولا تنسى الفياقرا !!
بوش : أي والله جبتها يا شاروني يا حبيبي ... والله انك عسل يا شرشوري !!
كوفي عنان : أبشركم أن الوضع في إجماع الدول الإسلامية جاء زي ما تبون عسل يا عسل !!
بوش : طيب وغيره !! هذا وعارفينه من قبل !! أبيك هالحين تروح وتأخذ معك توني بلير وتزرون ( تضغطون ) أذن رئيس إندنوسيا وماليزيا ... وقل لهم ترى إذا ماهديتوا شعبكم ترى والله ...... هم عارفين !! قلهم تعرفون بوش ّ!!
كوفي عنان : طيب أبشر وغيره
بوش : لآلا خلاص قم طس .. أبسولف أنا وعمك شارون !!

وبعد هذا الاجتماع راحت القارورة للمصنع لتعبئتها مره أخرى ولكن هذه المرة أرسلت مع مجموعة من القوارير مع الوجبات المخصصة للطيارين الأمريكان المشاركين في حملات التدمير وضرب أفغانستان .. وفعلا أخذها أحد الطيارين معه في الجو وكان يشرب البيبسى وهو يأخذ جولة فوق أفغانستان يدور شي يضربه ... ومن الزهق كان يتكلم مع نفسه وإليكم حديثة مع نفسه :
الطيار الحربي : اييييييييييه وين اصرف هالقذائف والله مافيه شي أضربه كل اللي أشوف بيوت وجبال وأودية !! وين هاللي يقولون معسكرات ... والله ما أشوف إلا بيوت ومتهدمة وهريانه ومافيها إلا ضعوف .... والمطار كل ماتوهقنا بالحمولة فرغناها في المطار !!
خل أكلم مركز القيادة وأسألهم : الووووو .... مركز القيادة ... تراي لي ربع ساعة أدور فوق أفغانستان ولا لقيت شي أضربه وين أودي هالحمولة ؟

مركز القيادة : يا رجال تصرف !! تويقع لك على أي بيت تحس إن فيه ناس واجد !!
الطيار : وبس ... ماتبون أضرب لكم هالوادي اللي فيه مويه خل نعطشهم !!
مركز القيادة : أقول تصرف ... تويقع لك على راس واحد له لحية ... أي واحد له لحية كبيره تويقع عليه !!

وفعلا ... تم تفريغ القذائف على المدنيين وعندها زعلت قارورة البيبسى وطاشت من الزعل وأنكبت على الطيار وقام من الزعل وجدع القارورة من الدريشة من على ارتفاع 1000 قدم مما تسبب في انكسارها ... ويكفيها فخرا أنها انكسرت في أرض أفغانستان بعد أن أبدت غضبها على التصرفات الصهيونية وما تفعله بالمسلمين !!
__________________


العم علي غير متصل  


قديم(ـة) 28-10-2001, 07:14 AM   #2
سعفة
عـضـو
 
صورة سعفة الرمزية
 
تاريخ التسجيل: Sep 2001
البلد: &^ ضراس المحتلة ^&
المشاركات: 3,493
موضوع جيد .. تعجبني والله ياعم ...... بس على فكرة

هل الببسي يصير شهيد والا لا هذا السؤال الي يطرح نفسه

.
.
.
ولا حركته هذي عملية انتحارية ..
.
.
.
.
.
.
:D
__________________
سعفة غير متصل  
قديم(ـة) 28-10-2001, 08:48 AM   #3
بدر الشايع
عـضـو
 
تاريخ التسجيل: Sep 2001
البلد: بريدة
المشاركات: 1,292
الله يعطيك الف ألف عافيه أخوي ( العم علي )...

والله إنك بار بأمك , بس الله يهديك وراك ماجبت لها سفن أحسن ..:D
وأنا أتوقع إن الببسيه طاحت من الدريشه .. بلاه يوم شافت وجه الخنزير ( شارون )...

موضوع جداً رائع ونتمنى منك إتحافنا بمثل هذي المواضيع المتميزة .
__________________
تسعدني زيارتكم لموقعي الشخصي
www.badr.cc
بدر الشايع غير متصل  
موضوع مغلق

الإشارات المرجعية

أدوات الموضوع
طريقة العرض

قوانين المشاركة
لا يمكنك إضافة مواضيع
لا يمكنك إضافة ردود
لا يمكنك إضافة مرفقات
لا يمكنك تعديل مشاركاتك

رمز [IMG] متاح
رموز HTML مغلق

انتقل إلى


الساعة الآن +4: 06:09 PM.


Powered by vBulletin® Version 3.8.6
Copyright ©2000 - 2017, Jelsoft Enterprises Ltd

المنشور في بريدة ستي يعبر عن رأي كاتبها فقط
(RSS)-(RSS 2.0)-(XML)-(sitemap)-(HTML)